Dibbatidu po s’eolicu

Zuncheddu (Rossomori): “Nos seus is erederis de Lussu. Custu cóniu de neufascismu no si fait a timi”

 (Il Minuto) – Casteddu, 2 de su mes”e làmpadas – “Provas ténnicas de fascismu”. Aici sa consillera de is Rossomori, Claudia Zuncheddu, lamat su “carraxu” chi s’est tentu ariseru in s’àula de bia Roma, a sa fini de su chistionu de su presidenti Ugo Cappellacci po s’afari de s’eolicu, candu at pediu su fueddu s’ex guvernadori Renato Soru.
Sa presidenti de is Rossomori giudicat mancantis is fueddus de Cappellacci (“Is intercetazionis – arremaciat – dd’iant ai depiu inditai de lassai s’incàrrigu, po ‘arregalu de is risorsas de sa terra de is sadrus’ a cambaradas afaristicu-políticas”) e denunciat “is aggràbius, is vulgaridadis, is modus de fai amelezosus chi si funt tentus in is cunfrontus de s’ex presidenti Renato Soru”.

Soru – narat Zuncheddu – “at scéti dimandau ca asuba de temas aici importantis e fundamentalis po su tempus benidori democraticu de sa Sardigna, si possat oberriri un dibbatidu mannu, chi permitat a totus is consilleris unu cunfrontu líbberu, francu e leali”.

Sa Cuferénzia de is Capugrupus iat perou decidiu a majoria de limitai a unu chistionu de 10 minutus po grupu su dibbatidu de s’afari eolicu in Consillu regionali.
“Custu carraxu dignu de su mellus fascismu berlusconianu – precisat sa sardista – trassau de is bancus de su centrudestra e de is ‘trupas colonialis’ at impidiu su cunfrontu custringendi is forzas de s’oposizioni in Consillu regionali a lassai s’àula po protesta”.

Zuncheddu narat a totus is forzas de s’oposizioni in Consillu regionali de si “movi po una vigilànzia democratica”. “No depeus permiti – concluit – ca s’Assembrea de is sadrus si trasformit in d’unu ‘acampamentu de grupixeddus’ po citai unu personàgiu a cussus caru. Is Rossomori, dignus erederis de Emilio Lussu, no s’ant a lassai intimorigiai de custu cóniu de neufascismu, ancora de mancu ant a permitiri ca custu modu de fai pagu democràticu pongat arrexinis, acabbonu cun s’agiudu de is càrigas istituzionalis de sa Regioni”.

Stampa