Motzioni po sa soberania e s’indipendentzia

Sa lingua sarda: “una maladia”

In su Consillu de mercurisi, 22 

Biu ca s’Art. 133-1 de is arregulas de custu Consillu, offendidi su populu sardu privendidu de sa lingua sua, sa mozioni mia a pitzus de s’Indipendentzia, iscritta in lingua sarda, po da podi depositai m’anti obbrigau a presentai sa traduzioni in lingua italiana, cumenti chi sa nosta fessidi una lingua istrangia.

Biu ca is cosas funti postas aicci, immoi, in su Guvernu Sardu chistionu cun sa lingua de su dominadori coloniali: s’italianu.

“…Come tutti ai popoli africani (e non solo) che hanno subito il colonialismo, anche al popolo sardo è stata tagliata la lingua e imposta quella del dominatore. In tutti i processi coloniali questo è il primo passo che si compie nella “sepoltura della memoria di un popolo”. Privarlo della sua storia e della sua identità è un “metodo aggressivo necessario” per renderlo debole, povero e meglio dominarlo.

Nel nostro processo di liberazione Nazionale, noi non possiamo prescindere dalla riacquisizione della nostra Lingua, perché essa è lo strumento che ci ha consentito di ereditare il ricco patrimonio identitario dai nostri padri e dalle nostre madri consentendoci di Esistere.

(Segue l’esposizione della mia mozione).

po ndi torrai a scriri sa Carta Sarda e po aberri cun su Stadu italianu su tretu po sa Soberania e s’Indipendentzia

Su Consillu Regionali,

Narendi in primu ca

In sa prus Assemblea manna de is Sardus, s’arraxonamentu apitzus de is prus chistionis de aprètziu chi pertocant sa Sardìnnia, comenti sa Soberania, s”Autodeterminazione” o apitzus de paràulas de identidadi comenti Pòpulu Sardu e Natzioni Sarda, no podit essi fatu sena de imperai sa Lìngua Sarda: chistioni chi apoderat s’identidadi de su pòpulu sardu e aina chi at permìtiu de eredai s’asienda nosta arrica de dònnia cultura e stòria chi nos’ant lassau is mamas e is babus nostus;

– sa lìngua sarda, cun is bariedadis suas, est oi sa prus chistioni funduda de sa resistèntzia populari contras de su sperditziamentu culturali, sotziali e econòmicu de su pòpulu nostu;

Torrendi a nai ca sa Motzioni  aprovada de custa assemblea su 24 de friàrgiu 1999 decrarat

– “s’arraxoni de su Pòpulu Sardu a essi meri de su tempus benidori cosa sua”

–  “S’arraxoni e su doveri de su Consillu regionali de arrepresentai totu su Pòpulu sardu, segundu s’artìculu 24 de su Statuto”

Torrendi a nai

S’arraxoni de su pòpulu sardu de defendi a afortiai s’Autuguvernu de sa Sardìnnia, comenti nau in su Patto Costituzionale arreconnotu cun sa Carta nosta de su 1948

S’arraxoni de su pòpulu sardu de detzidiri e guvernai po contu suu, ca est Pòpulu e Etnia, comenti stabilèssiu de su Deretu Internatzionali e de is deliberaus de is Natzionis Unias apitzus de is arraxonis  de is pòpulus

Averiguendi

ca 60 annus de Autonòmia

– no ant lòmpiu su pòpulu sardu a fai su prus tretu mannu de sa stòria sua, su de si guvernai de sei e de sprundi s’econòmia sua; po contras dd’ant fatu ancora prus tzeracu de su Stadu-meri colonialista italianu, amortoxinendi sa voluntadi de su pòpulu sardu de fai cussu tretu po sa libertadi e s’arrichesa suas,

– no ant agiudau a ponni a caminai in totu su Statuto de Regioni Autònoma, chi ancora no est postu a menti, chi est apatigau e incurbau a sa voluntadi polìtica e econòmica de su Stadu italianu,

– no ant agiudau a sminguai sa cundetzioni de dipendèntzia de sa Natzioni Sarda, chi in custu tempus de s’Unioni Europea e de sa globalizatzioni mundiali, est, po contras, amanniada in dònnia chistioni: in sa de sa polìtica, de sa finàntzia, de s’economia, de sa cultura, de sa scola, de sa sanidadi, de is basis militaris, de s’energia, de is benis culturalis e artìsticus, e fintzas  de is multinatzionalias econòmicas, sene nimancu arrennesci a assegurai s’arraxoni de is sardus a essi arrepresentaus in su Parlamentu Europeu;

Cunsiderendi ca

s’amanniamentu de una cuscièntzia e de una fidi in su Pòpulu sardu e in sa Natzioni Sarda funt s’arrichesa bona a fai tretus de cambiamentas e de sprundimentu, custas podint essi pensadas e aprontadas sceti si is istitutzionis de su Pòpulu sardu funt soberanas in totu, ca osinò tretu de indipendèntzia no fait a ndi fai;

s’identidadi stòrica, geogràfica, culturali e linguistica abisòngiat de un’identidadi polìtica crara e indipendenti;

Torrendi a nai ca ballint ancora is fundamentus de soberania achìpius in sa motzioni aprovada de su Consillu regionali su 24 de friàrgiu de su 1999 , cun is arraxonis stòricas, culturalis e politica, de aundi movit “la sovranità del Popolo Sardo sulla Sardegna, sulle isole adiacenti, sul suo mare territoriale e sulla relativa piattaforma marina”, torrendi, aici, a si-ndi fai meri, de sa Soberania intregada a cudd’ora a sa monarchia Sabauda po dda scambiai cun sa fusione perfetta  cun is Stadus de sa “terraferma”;

Decrarat acabau su tretu stòricu e istitutzionali fatu agoa de ai intregau sa soberania sua su 29 de donniasantu de su 1847, chi sceti in parti nd’at torrau a achipi su Statuto de su 1948;

No connoscit  sa pedidura fata de is Deputatzionis de is tres prus tzitadis mannas de sa Sardìnnia “rivolta alla impetrazione per la Sardegna della perfetta fusione con gli Stati Regi di terraferma, come vero vincolo di fratellanza, in forza di qual fusione ed unità di interessi si otterrebbero le bramate utili concessioni…” (Deliberatzioni de su Consillu Generali de Casteddu, de su 19 de donniasantu de su 1847);

Denùntziat ca no ballit sa cuntzessioni de sa ‘perfetta fusione’ deliberada de su Rei de Sardìnnia Carlu Albertu, cun Billetu Règiu de su 20 de su mesi de idas de su 1847, ca no fiat sodigada de peruna votazioni populari a plebiscitu  –  comenti at a essi in is àterus stadus italianus lompendi a s’unidadi de su 1861- apatighendi aici su chi narànt is Tratatus internatzionalis de Londra de su 1720 e prus che totu sena de su votu de is tres Stamentus sardus, ùnica assemblea chi si podiat destinai de serrai custa chistioni internazionali;

Est de s’idea

ca torrendi a scriri sa Carta nosta tocat a ddoi scriri is chistionis mannas de Autodeterminatzioni, de Indipendèntzia e de Autoguvernu Natzionali de su pòpulu sardu e de su disìgiu suu a essi in d-unu Mediterràneu de paxi, benistai e agualàntza sotziali;

ca su torrai a scriri sa Carta nosta e su tretu conca a s’autodeterminatzioni no potzat essi lassau in is manus de su Consillu Regionali sceti o de is comissionis suas, arrespetendi sa Soberania Populari e de s’Identidadi nazionali de su pòpulu suu;

Decrarat  ca su pòpulu sardu ndi tenit totu s’arraxoni, e nemus si-ndi-dda podit bogai, de intrai in parti in s’Assemblea Costituenti, cun d-unu arraxonamentu polìticu –  culturali e econòmicu aundi totu sa comunidadi sarda potzat intrai a torrai a scriri e avotai sa Carta nosta, mancai finsas cun d-unu referendum populari;

torrat a nai, abetendi a primitziai de si ponni a pari cun su Stadu Italianu e, in àteru logu, cun sa Comunidadi Europea, po fai su tretu costituzionali,  de arrespetai is prus chistionis apretziadas de s’economia, de su sotziali, de sa libertadi, de sa democrazia e de su benistai chi is pòpulus e is natzionis liberas connoscint;

Abarrendi de s’idea ca s’òmini no potzat fai su tretu de Autodeterminatzioni e de Indipendèntzia Natzionali  sena de fai intrai in parti su pòpulu sardu, movendi de sa defesa e apretziamentu de s’identidadi cosa sua culturali, stòrica, ètnica, linguistica, ambientali, de s’economia connota e de  lompi su pòpulu a su chi disìgiat

PONIT s’Assemblea de is Sardus e su guvernu suu, in cust’ora de disìgiu de soberania e de sciusciamentu de sa dipendèntzia coloniali, a si ponni a pari cun su Stadu Italianu e abetiai po s’arraxoni de su pòpulu sardu:

– po sa Soberania aìnturu de su Logu suu e po ndi bogai is basis militaris ;

– po  sa bonìfica de is giassus apatigaus e imbrutaus de su militari e de s’indùstria;

– po  ndi torrai ai sardus su Dinai mai arriciu de Intradas Fiscalis , Dinai FAS e de s’Europa pinnigaus foras de lei de su Stadu italianu;

– po agiudai e sprundi s’economia chi eus sèmpiri connotu, sa laurera, sa pastorìtzia, s’artigianau, sa pisca e.a.n. (e aici nendi) cun dinai de ponni luegus atotu po nd’amurrai  s’abisòngiu chi est currendi custa borta;

– po ndi strantaxai una scuadra nosta de navis, pùblica e privada, chi assegurit sèmpiri su biaxi a sa genti e a sa mercanzia.

PONIT sa Giunta a movi totu is chistionis impitzus arremonadas po segai sa dipendèntzia de su Stadu italianu e po fai unu tretu nou conca a sa Soberania e a s’Indipendèntzia.

Casteddu, su 7 de su mesi de Cabudanni 2010

Stampa